Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 18.140 | Dem. 18.143 (English) | >>Dem. 18.146 |
18.141καλῶ δʼ ἐναντίον ὑμῶν , ἄνδρες Ἀθηναῖοι , τοὺς θεοὺς πάντας καὶ πάσας ὅσοι τὴν χώραν ἔχουσι τὴν Ἀττικήν , καὶ τὸν Ἀπόλλω τὸν Πύθιον , ὃς πατρῷός ἐστι τῇ πόλει , καὶ ἐπεύχομαι πᾶσι τούτοις , εἰ μὲν ἀληθῆ πρὸς ὑμᾶς εἴποιμι καὶ εἶπον καὶ τότʼ εὐθὺς ἐν τῷ δήμῳ , ὅτε πρῶτον εἶδον τουτονὶ τὸν μιαρὸν τούτου τοῦ πράγματος ἁπτόμενον (ἔγνων γάρ , εὐθέως ἔγνων ), εὐτυχίαν μοι δοῦναι καὶ σωτηρίαν , εἰ δὲ πρὸς ἔχθραν ἢ φιλονικίας ἰδίας ἕνεκʼ αἰτίαν ἐπάγω τούτῳ ψευδῆ , πάντων τῶν ἀγαθῶν ἀνόνητόν με ποιῆσαι .
τί οὖν ταῦτʼ ἐπήραμαι καὶ διετεινάμην οὑτωσὶ σφοδρῶς ; ὅτι καὶ γράμματʼ ἔχων ἐν τῷ δημοσίῳ κείμενα , ἐξ ὧν ταῦτʼ ἐπιδείξω σαφῶς , καὶ ὑμᾶς εἰδὼς τὰ πεπραγμένα μνημονεύοντας , ἐκεῖνο φοβοῦμαι , μὴ τῶν εἰργασμένων αὐτῷ κακῶν οὗτος ἐλάττων ὑποληφθῇ · ὅπερ πρότερον συνέβη , ὅτε τοὺς ταλαιπώρους Φωκέας ἐποίησʼ ἀπολέσθαι τὰ ψευδῆ δεῦρʼ ἀπαγγείλας .
18.143τὸν γὰρ ἐν Ἀμφίσσῃ πόλεμον , διʼ ὃν εἰς Ἐλάτειαν ἦλθε Φίλιππος καὶ διʼ ὃν ᾑρέθη τῶν Ἀμφικτυόνων ἡγεμών , ὃς ἅπαντʼ ἀνέτρεψε τὰ τῶν Ἑλλήνων , οὗτός ἐστιν ὁ συγκατασκευάσας καὶ πάντων εἷς ἀνὴρ μεγίστων αἴτιος κακῶν . καὶ τότʼ εὐθὺς ἐμοῦ διαμαρτυρομένου καὶ βοῶντος ἐν τῇ ἐκκλησίᾳ “πόλεμον εἰς τὴν Ἀττικὴν εἰσάγεις , Αἰσχίνη , πόλεμον Ἀμφικτυονικόν ” οἱ μὲν ἐκ παρακλήσεως συγκαθήμενοι οὐκ εἴων με λέγειν , οἱ δʼ ἐθαύμαζον καὶ κενὴν αἰτίαν διὰ τὴν ἰδίαν ἔχθραν ἐπάγειν μʼ ὑπελάμβανον αὐτῷ .
18.142
Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 18.140 | Dem. 18.143 (English) | >>Dem. 18.146 |